Неправилни декларации на производите, неиспитани производи,
незаинтересираност кај матичните лекари, покачување на цената на брашното, високите цени, недоволно производи и немање на реагенси за антитела – се дел од проблемите со кои се соочуваат лицата заболени од Целијаклија, хронична автоимуна болест што се карактеризира со неподносливост на организмот на глутен.
Сара Каракамчева, претседателка на Здружението на целијакличари вели дека со моментално поскапената храна и кај нив се зголемиле двојно трошоците.
„Терапијата на месечно ниво ако го земеме само брашното изнесува 3840 денари само за него. Цените се високи и за посебни зачини, посебна козметика, посебни млечни производи. Има и незаинтересираност кај рестораните и кафеаните во однос на менијата и алергените, мора да готвиме од дома и да си носиме секаде храна со себе“, вели таа.
Единствена метода која ја дијагностицира оваа болест е биопсијата на тенкото црево, а како што појаснува Каракамчева ова заболување е доживотно.
„На примерокот земен за биопсија се забележува дека недостигаат ресичките на тенкото црево, слузницата е потенка и атрофична. Единствен лек и прво и основно правило за лечење на целијакијата е безглутенската диета, која треба да трае цел живот“, дополнува претседателката на здружението.
Според неа нема потреба здравите лица да го избегнуваат глутенот поради мода бидејќи глутенот има многу витамини, кои што болните ги внесуваат преку суплементи бидејќи во храната ги нема во толкава количина.
„Храната гледаме да е строго декларирана, ако не е, тогаш технолог да потврди од фирмата дека одреден производ не поминува на иста лента со глутенски производи, да нема контаминација, па дури и да не се произведува во ист погон“, завршува Каракамчева.
Болеста ги зафаќа сите возрасни групи од двата пола, но поголем процент се жени, а се појавува и кај доенчиња. Последица од оваа нетолеранција е глутенска ентеропатија што се манифестира кај некои луѓе со воспаление и оток на слузницата на тенкото црево, поради што е намалена ресорпцијата на храната. Почетните знаци за појава на болеста често може да се скриени. Видливи знаци се повраќање, надуен стомак, пролив, промена во столицата, мрзливост и неактивност, млитава мускулатура и замор.
Маја Терзиова