„Посетата на бугарската делегација на отворањето на културните клубови предизвика голема бура во медиумите во Северна Македонија. Со ваквиот однос на македонската влада, опозиција и македонскиот народ, се докажува дека Северна Македонија не е спремна и е многу далеку од европскиот пат. Не може некоја држава да бара да стане членка на европското семејство, а притоа да не ги исполнува европските вредности“, вели во колумната „Воскресенето треба да ги обедини Бугарите и Македонците“, објавена на насловната страница на бугарската агенција БГНЕС, авторот Тодор Вангелов, потпишан како македонски Бугарин од Скопје.
„Денес сме сведоци дека, и покрај сите макотрпни напори што ги прави Бугарија за да се реши заедничкиот проблем, односно тоа е проблем на РСМ, РС Македонија нема ни малку желба да мрдне чекор напред од мртва точка. Застаната е некаде во далечната 1944-45 година и нема волја да промени нешто“, вели авторот во колумната, која е објавена и од порталот Трибуна на македонски јазик зад кого стои Здружението на граѓани за слободно медиумско изразување ТРИБУНА од Прилеп.
Во опширниот текст се изнесуваат жестоки обвинувања на адреса на Македонија и политичкиот врв, при што се дава оценка дека политичките партии во Македонија „се заостанати во титово време“ и се нагласува дека „во нашата РС Македонија се шири омраза кон тие што ја зборуваат вистината“.
„Некои великодостојници не признаваат постоење на македонски Бугари односно според нив тоа би било цепење, делење на македонската нација. Но, ако одиме по таа логика, нели веќе македонската нација е расцепена, разделена на Срби, Власи, Роми, Албанци…? Зошто е проблем да се впишат и Бугари во македонскиот Устав? Зарем некој се плаши од тие 3504, според фалсификуваниот попис, Бугари?“, пишува авторот.
Во контекст на Велигден во текстот се вели дека на Теолошкиот факултет во Македонија, „исто како и на историскиот, се учи една фалсификувана црковна историја во која Охридската Архиепископија се прикажува како некаква македонска Црква а за Егзархијата се учи дека била Црква создадена за продор на бугарската пропаганда во Македонија т.е бугаризирање на македонското словенско население“.
„Република Северна Македонија треба да го испочитува и исполни договорот кој го потпиша со Бугарија, пред сѐ впишување на Бугарите во македонскиот Устав. Без тоа нема да заврши страдалниот пат, нема да стигнеме до заедничкото Воскресение“, порачува авторот на колумната. (С.К.)