Доколку ја одбие и оваа понуда за средба за излез од националната катастрофа што ја живее Македонија, ВМРО-ДПМНЕ ќе заседава, а потоа следат сериозни и досега непрактикувани чекори, нагласи денеска Мицкоски.
Претседателот на ВМРО-ДПМНЕ, Христијан Мицкоски, денеска го повика премиерот Димитар Ковачевски на јавна средба на која ќе разговараат за датум за одржување на предвремени парламентарни избори. На тој состанок тој има намера да предложи 4 тима, составени од ВМРО-ДПМНЕ, „од луѓе со искуство во областите во кои се детектирани клучните проблеми во нашата земја“.
Тој му да даде рок на Ковачевски до 10 мај да се изјасни дали ќе одговори на повикот, а доколку ја одбие понудата, Мицкоски се закани со, како што рече, „сериозни и досега непреземени чекори“.
– Не барам од Ковачевски да брза. Нека размисли, знам дека ќе го советуваат да одбие. Но, нека размисли, нека преспие, нека се советува со повеќе луѓе. Очекувам одговор во следните десетина дена. Нека биде краен рок 10 мај – вторник. Доколку ја одбие и оваа понуда за средба за излез од националната катастрофа што ја живее Македонија, ВМРО-ДПМНЕ ќе заседава, а потоа следат сериозни и досега непрактикувани чекори, нагласи Мицкоски на денешната прес-конференција.
Според лидерот на ВМРО-ДПМНЕ, има многумина што прашуваат „Што прави опозицијата“?
– ВМРО-ДПМНЕ овие 5 години е на самиот браник на државата, со сите бури, ветришта и удари со кои се соочивме. Не е нормално премиерот да нема комуникација со лидерот на најголемата политичка партија. Затоа, денес, јавно и отворено предлагам до Ковачевски заедничка и јавна средба, на која ќе разговараме и ќе договориме датум за одржување предвремени парламентарни избори како природно решение за состојбите во Македонија. На тој состанок имам намера да предложам 4 тима, составени од ВМРО-ДПМНЕ, кои ќе бидат составени од луѓе со искуство и луѓе што се покажале и докажале во минатото во 4 акутни области, во кои се детектирани клучните проблеми во нашата земја. Четири тима што ќе работат заедно со тимови од власта во меѓупериодот од сега до денот на одржување на предвремените парламентарни избори. Про боно, без никакви права и привилегии. Тука сме да ѝ помогнеме кога на Македонија ѝ е најтешко, потенцира Мицкоски.