Жал ми е што оваа голема трагедија се користи во политички цели. Обвинителството од почетокот презеде сè и одговорно пристапи. Очекувам за многу брзо Обвинителството во Тетово да се изјасни за случајот со трагедијата во тетовската модуларна болница, одговори јавниот обвинител Љубомир Јовески на пратеничко прашање од опозициската ВМРО-ДПМНЕ.
– Ако ние, како што беше поставено прашањето, сакаме да го забошотиме овој случај, немаше уште вечерта на помош на Обвинителството од Тетово да им ставиме на располагање двајца дежурни обвинители од Скопје и сите ресурси со кои располага ЈО. Дека Обвинителството постапува објективно зборува и фактот што се побара меѓународна помош од германски експерти за вештачење. Во овој дел од постапката не се преземени само овие вештачења, сослуашани се и други лица, има вештачење од техничкиот факултет на електричната инсталација. Сакам да ве уверам дека целосно го истражуваме овој случај и на поставените дилеми ќе дадеме одговори, рече Јовески.
Пратеникот од ВМРО-ДПМНЕ, Миле Лефков рече дека не е задоволен од одговорот на обвинителот Јовески и дека тој наместо одговор на пратеничкото прашање, дал вести стари седум месеци, што ги објавиле медиумите.
Јовески додаде дека истрагата за трагедијата во тетовската модуларна болница што се случи на 8 септември лани, при што во пожарот животот го загубија 14 лица, од кои 12 пациенти и двајца роднини на пациенти, е при крај и деновиве, за брзо време очекува Основното јавно обвинителството во Тетово да донесе одлука за овој настан.
Според истрагата на крим-техничарите на МВР, пожарот во модуларната болница во Тетово настанал како последица од електрична куса врска преку висок преоден отпор во приклучниот кабел на дефибрилатор со кој се вршела реанимација на пациент во една од болничките соби.
Прегревањето на кабелот предизвикало палење во приклучната кутија од продолжителниот кабел на кој бил приклучен дефибрилаторот, полнач за мобилен телефон и уште еден апарат. Вештачење вршеше и Технолошкиот факултет, кое треба да одговори на прашањето зошто модуларната болница, изгоре за само неколку минути.
Првичните информации дека продолжен кабел кој се прегреал го поттикнал пожарот кој за кратко време ја зафати болницата се очекува да добијат потврда во истрагата.
Активистите од движењето „Подобро за Тетово“ уште пред четири месеци побараа брзо расчистување на случајот и одговорност на сите инволвирани.