Парламентарното собрание на Советот на Европа повика на „итно“ формирање на специјален трибунал за истрага и гонење на кривичното дело агресија извршено од политичкото и военото раководство на Русија во Украина.
Дефиницијата на Меѓународниот кривичен суд (МКС) за кривично дело агресија вклучува инвазија на друга држава, бомбардирање и блокада на пристаништата. Меѓутоа, ако една држава не е дел од МКС, нејзините поединци не можат да бидат кривично гонети од судот.
Тоа ги поттикна поранешните премиери на Обединетото Кралство Гордон Браун и Сер Џон Мејџор, да повикаат на создавање нов меѓународен трибунал кој ќе го истражи Владимир Путин и оние кои помогнаа во планирањето на неговата инвазија на Украина.
Резолуцијата усвоена денеска од парламентарното собрание на Советот на Европа – прва таква донесена од меѓународна организација – вели дека треба да се формира ад хок меѓународен кривичен трибунал, со седиште во Стразбур, Франција, „со оглед на можните синергии со Европскиот суд за човекови права, кој се занимава со бројни поврзани индивидуални и меѓудржавни барања“.
Министерот за надворешни работи на Украина Дмитро Кулеба ја коментираше одлуката, велејќи дека Украина е „благодарна“. Кулеба рече: „Ги повикувам сите држави да се приклучат кон формирањето на таков трибунал. Заедно, ќе бараме одговорност од руското раководство“.