Се разгледува ново барање за екстрадиција на поранешниот премиер, Никола Груевски, кој, по правосилната пресуда за затворска казна во предметот „Тенк“, избега во Унгарија кадешто доби азил, изјави министерот за правда, Никола Тупанчески, на денешната прес-конференција.
Експремиерот Груевски избега во Будимпешта, Унгарија, на 11 ноември 2018 година.
Новото барање за екстрадиција следува по пресудата за случајот „Плацеви на Водно“ со која Груевски беше осуден на казна затвор од 7 години.
Против Груевски се водат и неколку други процеси, за изборни нерегуларности во „Титаник“, за изградбата на автопатиштата во „Траекторија“.
Тој е осомничен и за организацијата на настаните во Собранието од 27 април 2017 година, но за тој предмет сè уште не е поднесено обвинение против него, бидејќи беше недостапен за обвинителството.
Според изјавите од Министерството за правда, последното дополнување на барањето за екстрадиција е испратено на 13 јуни 2019 година.
Кон крајот на минатата година на Груевски му истече азилот од три години, но од Унгарија официјално не го информираа Министерството за правда за сегашниот статус на бегалецот, односно дали донеле одлука за продолжување на азилот.
Груевски избега од Македонија откако претходно од своите банкарски сметки подигна околу 120.000 евра. Бегството се случи откако беше осуден на двегодишна затворска казна за случајот „Тенк“ за купувањето на владиниот „мерцедес“.