Неодамна основаната унгарска компанија на поранешниот премиер Никола Груевски, имала успешен почеток на бизнисот и успеа да оствари нето добивка од 10.000 евра за нешто повеќе од пет месеци од работењето, пишуваат локалните унгарски медиуми, пренесе Балкан Инсајт.
Брзиот успех на бизнисот на поранешниот македонски премиер, регистриран на 14 јули минатата година во празна куќа во село оддалечено 20 километри од Будимпешта, ќе ги зачуди во Западен Балкан и пошироко, со оглед на досегашните криминални пресуди на Груевски и блискоста со унгарската влада на Виктор Орбан, наведува порталот.
Груевски беше осуден на две години затвор во 2018 година за недозволена набавка на луксузното возило „Мерцедес“ и на уште седум години за перење пари, минатиот месец, откако побегна од државата во 2018 година. Тој потоа доби азил од владата на Орбан по забрзана постапка, а неколку барања за екстрадиција од Македонија завршија безуспешно.
Груевски избегнува публицитет и малку се знае за неговите услови за живеење и активности. Но, тој се најде на насловните страници минатото лето кога ја основаше I.C.I.C. Ltd, мала компанија во заспано село на периферијата на Будимпешта. Фирмата е регистрирана во напуштена куќа без знаци на активност, а Груевски е наведен како единствен сопственик и главен извршен директор.
Главниот фокус на компанијата се деловни консултации, но исто така е лиценцирана да спроведува широк спектар на други активности, како што се трговија на големо со порцелан, стакларија и производи за чистење; трговија на големо со храна, пијалоци и тутун; управување со средства; и рекламирање, односи со јавноста и комуникација.
Иако I.C.I.C. функционира само од минатото лето, веќе успеа да стане профитабилна со приходи од 5 милиони форинти (13.000 евра), објави унгарската деловна веб-страница mfor.hu. Неговата нето добивка за периодот од средината на јули до крајот на годината изнесува 3,8 милиони форинти (10.000 евра).
Не се знае од кои активности произлегуваат приходите, но локалните медиуми шпекулираат дека парите би можеле да бидат поврзани со унгарското Министерство за надворешни работи.
Петер Сијарто, унгарскиот министер за надворешни работи, не крие за неговите редовни средби со Груевски. „Ако сакаме да ги имаме најавтентичните информации за тоа што се случува на Западен Балкан, со кого треба да разговараме, кој е подобар од некој што бил премиер таму 10 години?“, рече Сијарто во парламентот во 2019 година на прашањето за неговиот однос со Груевски.
На почетокот на април, Груевски беше ставен на списокот со санкции од американскиот Стејт департмент, но поради блиските лични односи на Груевски со премиерот Орбан, тоа веројатно нема да предизвика неговата влада да го промени својот пријателски пристап кон поранешниот лидер на Северна Македонија, се наведува во написот.