Американскиот професор, водечки колумнист во Њујорк Тајмс и нобеловец Пол Кругман, доаѓа во Скопје. Кругман ќе има 30-минутно обраќање на отворањето на годинешната конференција на Економскиот и финансиски форум (СЕФФ), платформа за дијалог на економски и финансиски теми, организирана од Министерството за финансии.
Нобеловата награда за економија Кругман ја доби во 2008 година за истражување за меѓународната трговија и економска географија, со што беше нов модел на меѓународна трговија.
Пол Кругман е се смета за еден од највлијателните економисти во денешницата. Освен по редефинирањето на теоријата за меѓународна трговија, тој е познат и како основач или коосновач на неколку нови дисциплини во меѓународната економија – од новата трговска теорија (NTT) и новата економска географија (NEG) до модели на финансиски кризи и движења на девизниот курс.
Во својата кариера, предавал на престижни универзитети како „Јеил“, Институтот за технологија на Масачусетс (МИТ), „Принстон“, „Стенфорд“ и на Лондонското училиште за економија. Автор или уредник е на 27 книги и повеќе од 200 академски трудови објавени во стручни списанија. Особено е популарна неговата колумна што ја објавува на страниците на „Њујорк тајмс“.
Годинешната, втора конференција на СЕФФ ќе се одржи на 30 и 31 мај 2022 година, во хотелот „Александар Палас“ во Скопје. (С.К.)