Шефот на грчката дипломатија Никос Дендиас денеска ќе престојува во еднодневна посета на Скопје, каде што ќе се сретне со министерот за надворешни работи Бујар Османи и со премиерот Димитар Ковачевски.
Дендиас ќе присуствува на работна вечера што ја приредуваат Османи и вицепремиерот за европски прашања Бојан Маричиќ.
Се очекува разговорите да бидат фокусирани на целосна и доследна имплементација на Преспанскиот договор, натамошно зајакнување на билатералните односи во сите области, вклучително и трговијата, економијата, енергетиката и европската перспектива на Северна Македонија. Се очекува да се разговара и за настаните во Западен Балкан и Источниот Медитеран, како и за ситуацијата во Украина по руската инвазија.
Ова е трета посета на Дендиас на Македонија. Првата беше во ноември 2019 година, втората во август минатата година, а министерот за надворешни работи на Северна Македонија Бујар Османи беше во посета на Атина во јануари 2021 година.