Кристијан Трајковски, организацискиот секретар на НСДП демантира дека се повлекол од битката за претседател, како што претходно објави извршниот одбор на партијата, повикуваќи се на одлука донесена на седница на која наводно партијата, сепак, на крајот решила на конгресот на 4 јуни да излезе со еден кандидат.
– Секое кандидирање и евентуално повлекување на кандидатура е лично право на кандидатот, смета Трајковски.
Тој обелодени дека во партијата поединци го злоупотребуваат партискиот мејл и тврди дека на тој начин ја дезинформираат јавноста.
– Информирањето на јавноста во мое име, од страна на други членови на НСДП го сметам за манипулативно, неетичко и крајно дискредитирачко и дезинформирачко. Од таа причина ги информирам медиумите и јавноста дека ваквата постапка ме поттикнува уште посилно да продолжам во мојата борба за слободна и демократска НСДП. На 4 јуни, на Петтиот Конгрес на партијата, согласно Статутот на партијата, ќе се самокандидирам за иден претседател на НСДП, а информациите за повлекување на мојата кандидатура се невистинити,– вели Трајковски.
Тој додава дека нема да дозволи да ја изневери довербата на членовите на НСДП, како и нивната искрена желба за демократски промени во партијата, повикувајќи ги сите делегати и членови на 4 јуни да постапат согласно сопственото убедување, волја и морал, со цел да се обезбеди вистински демократски конгрес, кој на крајот ќе ја обедини партијата.
Од партијата, претходно соопштија дека на крајот од седницата на Извршниот одбор, наводно Кристијан Трајковски, како потенцијален кандидат за претседател ја повлекол својата кандидатура и му честита на Горан Мисовски, единствениот кандидат за претседател на НСДП утврден од страна на Централниот одбор на партијата.
Трајковски, како што беше пренесено од седницата, упатува порака НСДП да остане единствена, обединета и да биде модерна партија, која ќе има значајна улога на македонската политичка сцена и партија со ново раководство, кое ќе продолжи да ги следи вредностите на основачот и прв лидер Тито Петковски