Распаднатата состојба на јавниот здравствен систем отвори простор за профит на приватните бизниси, пишува Балканинсајт.
Двајца инвеститори, едниот од бизнисот со обезбедување на безбедносни услуги за имот и луѓе, а другиот од светот на онлајн рекламирањето, угостителството и други дејности, отворија приватни здравствени компании во последните месеци – клиника и служба за итна интервенција.
Ова беа најновите големи инвеститори во здравствениот бизнис на Северна Македонија, во 20-те години откако приватното здравство доби замав во земјата.
Погледот на историите на најголемите инвестиции во здравството во овој период открива дека во овој бизнис долго време доминирале инвестициите на истакнати медицински професионалци како Жан Митрев или Емил Угриновски, странски компании или најбогатите бизнисмени во земјата, како Орце Камчев и Минчо Јорданов.
Но, ова се менува. Во изминатата година или две, во секторот влегоа помали инвеститори, вклучително и некои кои никогаш не работеле во здравството или имале какво било медицинско искуство. И покрај тоа, тие сепак избраа да инвестираат капитал во приватното здравство.
Сето ова укажува дека здравствениот бизнис стана поле во кое секакви инвеститори можат да намирисаат потенцијален профит.