Уставниот суд функционира на граница од кворум и многу луѓе се засегнати од предметите кои заостануваат, како што се законите за социјална заштита, за јавно обвинителство, за даноци и одлуки за оспорување на ДУП-ови, изјави претседателката на Уставниот суд Добрила Кацарска, по денешниот работен состанок со претседателот на државата Стево Пендаровски, премиерот Димитар Ковачевски и претседателот на Собранието Талат Џафери.
– Апелирам Уставот да се почитува. Важни прашања, како што се Указот за прогласувањето на Преспанскиот договор и Законот за јазиците нема да бидат ставени на дневен ред на седница се додека не се изберат сите девет судии во Уставниот суд, изјави Кацарска.
Уставниот суд е со четири судии помалку од предвиденото и оваа состојба трае повеќе од шест месеци. Со ваква ситуација судот се соочува за првпат и со секој поминат ден граѓаните трпат штети, бидејќи нивни иницијатвии и предмети се одложуваат, а Судот не може да одлучува, објасни Кацарска.
Според неа, ако до декември не се изберат судии,тогаш дефинитивно Уставниот суд е блокиран зошто со четворица судии нема да може да се работи и одлучува.
Оваа состојба, нагласи Кацарска, не е проблем само за Уставниот суд, туку и на државата и очекувам поддршка и нивна заложба за побрзо надминување на ситуацијата.
– Уставниот суд е независна институција и токму поради намерата да се заштити независноста и угледот на судот, неформални средби со политичари немаме и нема да има ниту во иднина. Затоа ќе ја информираме јавноста за секоја промена и сите апели и барања за поддршка, изјави Кацарска.
Овој проблем е на штета на граѓаните. Состојбата е проблематична и во очите на меѓународната заедница, додаде претседателката на Уставниот суд.