Предвремени парламентарни избори се единствено решение за економската и политичка криза во која се наоаѓа државата предводена од владата на СДСМ и ДУИ, порача вечерва опозициската ВМРО-ДПМНЕ од протестот кој се одржува пред Владата под мотото „Премногу е“.
Граѓани од цела Македонија, симпатизери на ВМРО-ДПМНЕ дојдоа вечерва во Скопје каде се очекува свое обраќање да има лидерот на партијата, Христијан Мицкоски.
Претходно, потпретседателот на ВМРО-ДПМНЕ Тимчо Муцунски рече дека не верува оти од утре магично ова владејачко мнозинство ќе одлучи да даде предвремени парламентарни избори.
– Зошто е тоа така? Затоа што истото тоа мнозинство ја има тезата дека за четири месеци направиле повеќе од некои влади што направиле за четири години, рече Муцунски.
Пратеникот Антонио Милошоски изјави дека премиерот Ковачевски и министрите треба да прифатат избори и народот да процени кој подобро ќе ја води државата напред.
– Владата, министри на СДСМ и ДУИ тврдат дека направиле добри чекори за државата добри потези, добри проекти и тоа е еден аргумент плус. Ако власта смета дека е направено нешто добро во било која област, култура земјоделие, образование, катастар, странски инвестиции, медиуми или нешто слично, нека повелат на избори и тоа што го направиле нека го престават дали е добро или кој е подобар, додаде Милошоски.
