Слабиот одѕив, лошата организација или со еден збор неуспешноста на денешниот митинг на ВМРО-ДПМНЕ предводено од Христијан Мицкоски упати јасна порака, се вели во реакција на владејачката СДСМ по завршувањето на вечерашниот протест на опозицијата.
– Граѓаните на Скопје и од целата држава вечерва на Мицкоски и на ВМРО-ДПМНЕ им порачаа дека се против деструкции и блокади, не ги поддржуваат антидржавните делувања и не се за предвремени избори.Ваквата постапка од народот е очекувана за СДСМ, се вели во реакцијата.
Според СДСМ, првата цел на денешниот митинг беше обид за блокада на државата во клучни моменти и обид да се попречи успешното справување со најголемата економска и енергетска криза.
– Таа цел не успеа туку доживеа целосен дебакл. Сите чекори кои што се преземаа во изминатите неколку месеци беа со оваа цел, и за внатреша употреба во рамки на ВМРО-ДПМНЕ и пропаднатиот митинг покажа дека се прочитани од граѓаните, вели СДСМ.
Не може човекот кој брани криминал од епски размери, додаваат социјалдемократите, потврден со судски долуки, како Талир 2, кој незаконски грабал од народот за криминално да го направи Белиот дворец друго да понуди.
– Човекот кој едно вели дома, а друго надвор не може да биде опција за граѓаните, ниту за иднината.Требаше да ја стави пратеничката група во функција на граѓаните и законските решенија за подобрување на животниот стандард во услови на глобална и економска криза но тој продолжува со својата тврдоглавост на штета на граѓаните. Ништо ново од Мицкоски, граѓаните тоа го препознаа, реагира СДСМ.
Владата предводена од СДСМ и премиерот Ковачевски има план, има решенија, се додава во партиското соопштение:
– Политиките за подобрување на стандардот на граѓаните и соочување со предизвиците од кризата продолжуваат. Сите обиди за нови блокади и деструкции на Мицкоски преземаме обврска повторно да ги поразиме, порачува СДСМ.