Претседателот на Регулаторната комисија за енергетика Марко Бислимоски во моментов држи прес -конференција на која ги објави новите цени на електричната енергија кои ќе важат од 1 јули, и кои ќе се пресметуваат според таканаречени тарифни блокови кои се воведуваат првпат. Ќе има четири тарифни блокови, од кои се прогнозира дека најефтин ќе биде првиот тарифен блок кој опфаќа месечна потрошувачка до 210 киловатчасови, а со потрошувачката ќе се зголемуваат и цените, вториот блок е за потрошувачка од 210 до 630 киловатчасови, за третиот од 630 до 1050, и четвртиот кој е најскап е за месечна потрошувачка над 1050 киловатчасови.
„За да нема недоразбирање, просечната цена на електрична енергија за 98,8 проценти домаќинства, за трите блокови ќе се зголеми за 7,4 проценти во однос на сегашната цена. Доколку не беа воведени блоковите, зголемувањето ќе беше 17,74 проценти“, рече Бислимоски.
Зголемувањето на цената во блокови изнесува 5,5 проценти за првиот блок, 10,3 проценти за вториот, 18,3 проценти за третиот блок и фантастични 138,7 проценти за четвртиот блок. Се зголемува и цената на ефтината тарифа и тоа за 8,69 проценти. Во ефтината тарифа нема да има блокови.
Бислимоски рече дека се очекува во зима кога има зголемена потрошувачка сметките за електрична енергија на домаќинствата да бидат поголеми за 6 до 8 проценти.
Тој објасни дека доколку едно домаќинство потроши на пример 300 киловатчасови сметката ќе ја плати со пресметување на разликата во цената за првиот блок кој е до 210 киловати, а потрошените 90 киловати по цена која важи за вториот блок, и така со сите наредни блокови. (С.К.)