Со извици „никогаш Северна“, „Бесилка“, точно напладне почнаа протестите пред Собранието против францускиот предлог кој е на дневен ред на пленарна седница пред пратениците. Од опозициската ВМРО-ДПМНЕ и Левица како што најавија и денеска ќе ги поддржат протестите под мотото „Ултиматум-не благодарам“ и ќе порачаат Владата да го отфрли предлогот кој според нив е штетен и води кон бугаризација.
Протестот денеска почна порано од вообичаеното, поради собраниската седница на која ќе се расправа по Информацијата од Владата за предлог преговарачката рамка на француското претседателство. Пред пратениците е најавено обраќање и на претседателката на Европската комисија, Урсула фон дер Лајен.
Атмосферата меѓу учесниците на протестот е мирна. Се пејат патриотски песни, се интонираше и пееше македонската химна, на моменти се создава бучна атмосфера со употреба на свирчиња и труби, се скандира „оставка, оставка“, „никогаш Северна, само Македонија“, „Македонија, Македонија“.
Улицата „11 Октомври“ пред Собранието е затворена за сообраќај, како и улицата „Даме Груев“ што ја сече кај Градската општа болница.
Силно полициско обезбедување е присутно во строгиот центар на градот и на неколку точки вдолж улицата „Мито Хаџивасилев Јасмин“. Полициски екипи се распоредени кај дирекцијата на Макпетрол, кај зградата на Автомакедонија, спроти Музејот на Град Скопје, спроти Рамстор и особено кај зградата во која е сместена Делегацијата на Европската унија во Скопје. (С.Д.)
