Речиси 1.200 мигранти без документи пристигнале во Италија во изминатите 24 часа, соопштија властите.
Мигрантите, кои потекнуваат од неколку африкански и блискоисточни земји стапнаа на неколку пристаништа во Сицилија. Официјални лица соопштија дека 674 луѓе биле спасени и пет мртви тела извлечени од пренатрупан рибарски брод во близина на брегот на Калабрија. Други 522 луѓе спасени од околу 15 чамци беа донесени во Лампедуза во саботата.
Чамците тргнале од Либија и Тунис. Лампедуза е едно од главните пристаништа за пристигнување на луѓето кои сакаат да стигнат до Европа.
Меѓу спасените има и мигранти од Авганистан, Пакистан, Судан, Етиопија и Сомалија.
Според италијанските медиуми, имиграцискиот центар на островот е опседнат од огромен пораст на мигранти во последните недели. Новинската агенција Анса објави дека центарот е со капацитет од 350 лица, а на локацијата моментално се наоѓаат околу 1.184 луѓе.
Медитеранот е еден од најопасните патишта за тајни миграции. Според Високиот комесаријат за бегалци на Обединетите нации (УНХЦР) во 2021 година околу 3.231 лице биле регистрирани како мртви или исчезнати во Медитеранот и северозападниот дел на Атлантикот.
Многумина од оние што поминуваат преку опасниот премин го прават тоа со импровизирани бродови склопени од шверцери на луѓе и честопати се оставени напуштени среде морето откако бродовите ќе откажат. (Би-Би-Си)