Експерти работат на префрлање на веб-страницата на Министерството за образование и наука на друга платформа, а воедно се работи и на дополнителна заштита од напади од надвор, појаснуваат од Министерството. Иако школската година започна, веб страницата се уште не е во функција со што се загрозени можностите на студентите да се информираат за испитите и наставата но и за сместување во студентски домови. Додека трае консолидацијата на интернет страницата, за учениците и студентите е активен налогот на социјалните мрежи преку кој Министерството за образование им ги соопштува новостите.
Веб страницата беше исклучена веднаш по хакерскиот напад на 9 септември, кој според Министерството на нанесе штети за злоупотреба на податоците и другите содржини на платформата. Министерството вели дека експерти работат на вградување на посилна заштита на страницата, но и на префрлување на друга платформа.
МОН од првиот ден е во комуникација со Националниот ЦИРТ центар за компјутерски инциденти при Агенцијата за електронски комуникации, каде што беше пријавен случајот и од каде, заедно со МВР се преземат активности за пронаоѓање на локацијата и изворот на нападите.
Инаку, хакерите оставиле свој потпис: Хакирано од грчкиот хакерски тим ,,Netwatchers”.
Минатата недела цел на хакерски напад беше и Министерството за земјоделство, водостопанство и шумарство, кој напад се смета за посериозен бидејќи се работи за напад врз електронскиот систем што во праксата значи барање на голем откуп за да бидат вратени податоците и повторно да профункионира системот.
Последниве месеци актуелни се информациите за хакерски напад од големи размери врз електронскиот систем на албанската влада за што официјална Тирана го обвини Иран и ги прекина дипломатските односи со таа земја.