Во Владата денеска попладне ќе има средба меѓу премиерот Димитар Ковачевски и лидерот на ВМРО-ДПМНЕ Христијан Мицкоски. Средбата е закажана за 16 часот.
„Прифатен е повикот од премиерот Ковачевски за утрешна средба каде ќе присуствува економскиот тим на ВМРО-ДПМНЕ предводен од Христијан Мицкоски. Ги нудиме нашите ресурси и концептот. Утре ќе биде запознаен и премиерот. Би требало да се разговара во вакви тешки времиња и треба да седнеме заедно најголемата опозициска партија со Владата“, изјави синоќа Маја Кадиевска од Извршниот комитет на ВМРО-ДПМНЕ.
На средбата и претходат бурни меѓупартиски обвинувања околу начинот на справувањето со енергетската криза, при што лидерот на ВМРО-ДПМНЕ понуди свои контакти за набавка на мазут и гас со кои тврди дека ќе се заштедат 300 милиони евра.
На ваквите прозивки од опозицијата, претставниците од власта одговараа дека опозицијата и во време на корона кризата добивала покани за економскиот совет, но ВМРО-ДПМНЕ не покажала интерес да учествува. Пред да падне договор за денешната средба, Владата го покани Мицкоски да присуствува на следниот состанок на Економскиот совет што треба да се одржи утре.