Претседателот на САД, Џо Бајден, изјави дека американската демократија е на удар бидејќи лажните тврдења на неговиот претходник Доналд Трамп за украдените избори „го поттикнаа опасниот раст на политичкото насилство и заплашувањето на гласачите“, јавува Агенција Анадолија (АА).
„Американската демократија е на удар затоа што поразениот поранешен претседател на САД одбива да ги прифати резултатите од изборите во 2020 година“, рече Бајден во обраќањето на настанот на Демократскиот национален комитет во Вашингтон.
„Тој одбива да ја прифати волјата на народот. Тој одбива да го прифати фактот дека ја изгуби работата, ја злоупотреби својата моќ и ја стави лојалноста кон себе пред лојалноста кон Уставот“, рече американскиот претседател.
„И тој направи една голема лага да биде несомнен слоган во кој се верува на Републиканската партија – МАГА, односно на помалиот дел од таа партија“, додаде Бајден.
Неговите коментари дојдоа шест дена пред средномандатните избори на кои Американците ќе избираат членови на Конгресот и локални претставници.
„Големата иронија за изборите во 2020 година е што тоа се најнапаѓаните избори во нашата историја. Но сепак, нема избори во нашата историја на кои можеме да бидеме посигурни за резултатите од нив“, посочи Бајден.
Американскиот претседател, исто така, се осврна на минатонеделниот напад врз сопругот на претседателката на Претставничкиот дом, Ненси Пелоси, Пол Пелоси, и го поврза со насилството што ги предизвика немирите во Капитол на 6 јануари.
„Ова заплашување, ова насилство врз Демократите, Републиканците и непартиските претставници кои само си ја вршат својата работа, се последица на лагите кажани за моќ и профит, лаги на заговор и злоба“, нагласи Бајден и додаде:
„Во овој момент мораме да им застанеме на патот на тие лаги со вистината. Од тоа зависи самата иднина на нашата нација.“
„Мои сограѓани Американци, се соочуваме со одлучувачки момент, точка на промена. Затоа денеска упатувам повик до сите Американци, без разлика на партиската определеност, да го исполнат овој момент од национално и генерациско значење. Мора да гласаме знаејќи што е во прашање, а не само за политиката на моментот“, порача американскиот претседател.
подготви: Д.Варошлија
Извор: Цивил медиа