Светската популација денеска надмина осум милијарди луѓе, објавија Обединетите нации, предупредувајќи дека регионите кои веќе се соочуваат со недостиг на ресурси поради климатските промени имаат повеќе тешкотии, пренесува Ројтерс.
„Овој значаен момент е повод да се слави различноста и напредокот, притоа признавајќи ја заедничката одговорност на човештвото за планетата“, се вели во изјавата на генералниот секретар на ОН, Антонио Гутереш.
Постигнувањето на осум милијарди луѓе е „знак за успех на човештвото, но исто така е голем ризик за нашата иднина“, рече Џон Вилмот, директор на одделот за население на ОН.
Земјите со среден приход, претежно во Азија, имаат најголем дел од тој раст, зголемувајќи го своето население за околу 700 милиони луѓе од 2011 година,пренесе Танјуг.
ОН го припишува овој раст на човечкиот развој, при што луѓето живеат подолго благодарение на подобрувањата во јавното здравје, исхраната, личната хигиена и медицината.
Тоа е резултат и од повисоките стапки на наталитет, особено во најсиромашните земји во светот – од кои повеќето се во субсахарска Африка – што ги става на ризик нивните развојни цели.
Растот на населението исто така го зголемува влијанието на економскиот развој врз животната средина.
Но, додека некои се загрижени дека осум милијарди луѓе се премногу за планетата Земја, повеќето експерти велат дека најголемиот проблем е прекумерната потрошувачка на ресурси од страна на најбогатите луѓе.