Претседателката на Судскиот совет Павлина Црвенковска денеска поднесе оставка од функцијата поради како што вели медиумската хајка која „била спроведена бидејќи нејзиниот избор не и одговарал на група од судската – бизнис елита.
„Ја известувам јавноста дека поднесувам оставка од позицијата претседател на Судскиот совет на РСМ. Веднаш по мојот избор на функцијата започна медиумска хајка со крајна цел да дадам оставка затоа што мојот избор за претседател не одговараше на група од судската – бизнис елита. До ден денешен хајката не престана преку пласирање лажни информации до новинари, а во континуитет се опструираа и намерно се одолговлекуваа внатрешните процеси во Советот, кои се од клучно значење за успешно завршени задачи и за функционирањето на судството.“, вели Црвенковска.
Според неа, стана жално што наместо да се посветиме заеднички на активностите и реформите и да ја унапредиме состојбата во судството, „некому стана поважно како да ме нападне и како да им наштети на проектите“.
Таа потенцира дека последен пример со лажно брифирање на новинарите бил околу тоа дека е нејзина незаконската одлука за избор на член во Управниот одбор на Академијата за судии и јавни обвинители, иако како што вели „јас ниту го предложив, ниту го гласав членот на Судскиот совет, Зоран Герасимоски. Се надевам дека идниот претседател ќе биде подобен за оваа судско – бизнис елита’.
Црвенковска вели дека е благодарна на оние колеги кои покажале почит и ја поддржиле во намерите нешто да се промени, но сепак, таа вели “Советот како колективно тело одлучува по која патека ќе се движи судството“.