Не е планирана реконструкција на Владата. Сега е период кога се подготвуваме за идната година. Интензивно ги презентираме буџетите на секое министерство поединечно, изјави премиерот Димитар Ковачевски. Повторно е категоричен дека нема да се одржат предвремени парламентарни избори.
„Владата функционира во полн капацитети за да се справи со сите предизвици кои ги има државата, а верувајте ми дека ова е мандат 11 месеци веќе којшто е исполнет со големи предизвици со какви што досега не се соочувала ниту една влада, на еконономски, на енергетски план и ајде да кажеме на планот на обезбедување, на непречено функционирање на сите институции со оглед на хибридните закани којшто доаѓаат а кои се резултат на војната која што се води во Украина“, рече Ковачевски.
На прашањето дали трибините што ги организира СДСМ се вовед во предвремени избори тој одговори дека ќе се одржат парламентарни избори заедно со претседателските во 2024 година.
„Јас сум човек којшто се држи до своите ставови и не менувам ставови како други политичари и избори ќе има во 2024 година, прво претседателски, а потоа парламентарни избори. И самата анкета (ИРИ) ви покажува дека граѓаните се определени за европска иднина на државата, бидејќи доколку се погледнат внимателно рејтинзите на партиите кои се за европска Македонија и зачленување во ЕУ и партиите кои што се за блокирање на тој процес, се гледа разлика и можете уште сега да го видите резултатот дека во 2024 ќе имаме претседател на држава којшто е за зачленување на Северна Македонија во ЕУ, а таков можеме да предложиме само ние СДСМ нормално со коалициските партнери“, рече Ковачевски.
Тој, исто така, е убеден и дека во 2024 година повторно ќе има влада која што ќе биде предводена од СДСМ и коалициските партнери кои се за продолжување на европскиот пат на државата и зачленување до 2030 година во ЕУ.