Основното јавно обвинителство Скопје донесе наредба за спроведување истражна постапка против мажот кој ги уби својата мајка и баба -со што сторил две кривични дела – убиство.

„При вршење семејно насилство, во семејниот дом на улицата ‘Франклин Рузвелт’ во Скопје, осомничениот ги лишил од живот сопствената мајка и баба, нанесувајќи им повеќе убоди со нож. Откако ги убил, ноќта меѓу 10 и 11 јануари, тој легнал да спие. Утрото на 11 јануари проверил и се осигурал дека двете жени се починати, по што се упатил кон домот на неговиот чичко со намера и него да го убие. Чичко му не бил дома, по што осомничениот отишол кај матичната лекарка и и кажал дека ги убил неговите мајка и баба“, велат од Обвинителството давајќи му хронологија на овој морничав настан.

Бидејќи постои опасност од бегство и опасност осомничениот да стори ново кривично дело со кое се заканува кон неговиот чичко, надлежниот јавен обвинител до судијата од Основниот кривичен суд Скопје достави предлог за определување мерка притвор, се вели во денешното соопштение.​