„Под влијание на многу студена и сува воздушна маса од север, во текот на оваа седмица времето во Македонија ќе биде стабилно, суво и многу студено, односно променливо облачно со сончеви периоди. Денес се уште ќе дува умерен до засилен ветер од северен правец, особено изразен долж Повардарието“, вели за Нова метеорологот Славчо Попоски.
Минималните температури, како што дополнува тој, на повеќе места ќе се спуштат до околу – 10 степени, некаде и до околу – 15 степени, додека во северозападните високи планински предели и под – 15 степени.
Максималните дневни температури пак исто така на повеќе места ќе се задржат под нулата и ќе се искачуваат во интервалот од – 5 до плус 4 степени.
Врнежи од снег оваа седмица не се очекуваат што значи ќе имаме сув голем студ, нагласува Попоски.
Во Скопје и околината исто така времето ќе биде променливо облачно со сончеви периоди и многу студено. Денес се уште ќе дува умерен до засилен ветер од северен правец. Минималните температури ќе спуштат во интервалот од – 7 до – 5 степени а максималните дневни ќе се искачуваат во интервалот помеѓу – 1 и плус 2 степени.
Во следниот период ветерот ќе ја намали својата брзина и ќе биде со слаб до умерен интензитет. Утре сеуште особено долж Повардарието ќе биде со засилен интензитет. Исто така воздушниот притисок во следните денови ќе биде многу висок, што значи дека ќе бидеме под влијание на силен антициклонски систем, прогнозира Попоски.