„Во контекст на разговорите со претседавачот на Еврогрупата, одлучено е да не поднесеме конвергентен извештај на крајот на февруари, бидејќи не ги исполнуваме критериумите. Со оглед на тоа што не поднесуваме извештај за конвергенција на крајот на февруари, повеќе не важи рокот за влез во еврозоната до 1 јануари 2024 година“, рече денеска на брифинг во Софија вршителката на должност министерка за финансии Росица Велкова, јави БГНЕС.
Велкова нагласи дека европските партнери на Бугарија веројатно внимателно ги следеле дебатите во 48. Народно собрание. Според неа, следното Народно собрание мора да донесе неколку предлог-закони за влез на Бугарија во еврозоната, бидејќи европските партнери сметаат дека државата сериозно заостанува во законодавниот дел.
„Бугарија мора да донесе четири предлог-закони и мора да го исполни критериумот за инфлација“, рекла Велкова.
Можен е и датум за влез во еврозоната од 2025 година, можен е датум од 1 јули 2024 година, се зависи од тоа дали се исполнети критериумите“, додала привременaта министерка за финансии.
И покрај најавите за вето од Холандија и Австрија, Бугарија на 6 декември 2022 година во Брисел потпишала меморандум за почеток на производство на монети евра. „Стратегијата за комуникација е подготвена. Подготвен е концепт за евро-законот. Беше подготвено и национално репрезентативно истражување за ставовите на јавноста. Беа изработени и предлог-закони кои се однесуваат на заложбите на Бугарија за пристапување на земјата во Валутниот механизам 2. Остварени се повеќе средби со амбасадорите на земјите членки на еврозоната во Бугарија“, посочила министерката.
Министерката нагласи дека преодната влада ги интензивирала разговорите со Европската комисија и земјите членки на еврозоната.