Ковачевски, Бочварски и градоначалникот Арбен Таравари денес во Гостивар доделија клучеви од нови домови на 45 семејства од социјално ранливи категории.
„Да имаш топол дом, покрив над глава за своите деца, за семејството значи многу и навистина сум среќен што денеска сите заедно, овде во Гостивар ја споделуваме среќата на 45 семејства, на кои им врачуваме клучеви од нивните домови“, рече премиерот.
Ковачевски дополни дека во изминатите четири години се изградени или се во фаза на изградба 864 социјални станови.
Досега освен овде во Гостивар, распределени се станови во Македонски Брод, Струмица, Пробиштип, Виница, Свети Николе. Становите се доделуваат веднаш откако ќе се изградат, такви огласи за распределба на станови во тек се во Гевгелија, завршена е градбата на социјалните станови во Демир Капија и таму становите треба да се распределат. Во завршна фаза се социјалните станови во Неготино, а за над 500 наши сограѓани се градат социјални станови во Дебар, Бутел, Велес, Кочани и Сарај.
„Нашата владина политика е за развој на секој дел од државата, затоа и социјалните станови кои ги градиме се наоѓаат низ целата држава. Така обезбедуваме рамномерен регионален развој и во извесна мера изедначување на станбениот стандард“, истакна Ковачевски.
Министерот за транспорт и врски, Благој Бочварски истакна дека Владата и Министерството ги преземаат сите мерки за ублажување на последиците од кризата и за обезбедување подобри услови за живот на сите граѓани.
„Овој месец само за десетина дена распишавме два јавни повици за распределба на социјални станови во Гевгелија и Демир Капија“, рече тој.
Градоначалникот и нов коалициски партнер во Владата Арбен Таравари истакна дека набрзо домување ќе добијат уште 25 семејства од ранливите категории граѓани.
„Мило ми е што еден добар проект се реализира за гостиварци. Денеска 45 гостиварски семејства ќе бидат здомени во нови станови, а уште 25 се надевам во многу блиска иднина. Овие се убави работи кои што државата може да ги направи за социјално загрозените семејства“, рече Таравари.