Утрово во продавниците нема испорака на тазе леб. На рафтовите има само од старите залихи на леб и тоа од специјалните видови. И покрај најавата на пекарниците дека нема да испорачуваат леб, граѓаните се изнанадени и револтирано излегуваат од маркетите.
„Бев во неколку продавници, нема да се купи леб. Не знам дали е ова во ред. Слушнавме на вести синоќа, но не ми се верува дека и покрај субвенциите што ги добиваа пекарниците, може вака алчно да се однесуваат кон потрошувачите“, вели еден пензионер што утрово тргнал по леб.
Оваа одлука на пекарите следи откако, владата ја замрзна цената на белиот и полубелиот леб на 33 денари.
Владата пресметала дека дел од поскапувањата се неоправдани, а како аргумент плус го наведоа и тоа што ист леб се продава по драстично различни цени низ земјава – од 28 до над 45 денари.
Освен замрзнувањето на цената на лебот, владата ја укина и субвенционираната струја за прехранбената индустрија.
А.В