Руската инвазија на Украина имаше „погубни“ последици за децата сместени во домови, при што илјадници од нив беа префрлени на окупираните територии или во Русија, соопшти Светската организација за човекови права.
Во извештајот објавен денеска, исто така, се вели дека војната ја истакнала итната потреба од реформи во Украина, каде пред инвазијата имало повеќе од 105.000 деца во институциите – најголем број во Европа по Русија.
„Оваа брутална војна јасно ја покажа потребата да се стави крај на опасностите со кои се соочуваат институционализираните деца“, рече Бил ван Есвелд, помошник директор за правата на децата во организацијата со седиште во Њујорк.
„Враќањето на децата кои нелегално беа земени од руските сили мора да биде меѓународен приоритет“, додаде тој.
Во извештајот се вели дека најмалку неколку илјади деца биле префрлени во Русија или на окупираните територии.
Во него се додава дека 100 институции, во кои имало повеќе од 32.000 деца пред 2022 година, сега се наоѓаат на територии под руска окупација.
Речиси две децении Украина се обидува да го реформира системот, но бројот на детски институции само се зголеми – од 663 во 2015 година на 727 во 2022 година, се вели во извештајот.
Како резултат на војната многу повеќе деца ќе останат сираци или ќе бидат одвоени од своите родители.
„Децата се сместени во нови институции, вклучително и деца чии родители се убиени и ранети, како и деца чии родители доживеале ментални кризи како резултат на војната“, велат од Хјуман рајтс Воч.
Извештајот од 55 страници истакна други проблеми, вклучително и психолошка траума за раселените деца, како и занемарување и несоодветна грижа поради недостаток на старатели.
„Многу деца во институциите мораа да се кријат со недели од бомбардирањето во подруми без струја или вода, вклучително и деца со посебни потреби“, се вели во извештајот.
„Група деца од установа во Мариупол не зборуваа четири дена откако беа евакуирани во Лавов, во март 2022 година“.
Набљудувачите, исто така, велат дека илјадници деца од институции се раселени во странство, а некои од нив и понатаму се водат за исчезнати.