Министерката за одбрана Славјанка Петровска утрово во Брисел се сретна со претседавачот на Воениот комитет на Европската Унија, генералот Роберт Бриегер, со кого разговараше за придонесот на Северна Македонија кон регионалната и глобалната безбедност и за интензивирањето на одбранбената соработка помеѓу нашата држава и Европската Унија.
„Навистина можеме да бидеме горди на постигнатото. Од увозник на безбедноста, Северна Македонија се позиционираше како столб на регионалната безбедност и стабилност. Потврда за тоа е нашето учество во операцијата на ЕУ во Босна и Херцеговина, АЛТЕА од 2006 година, како и нашето учество во борбените групи на Унијата“, рече министерката на состанокот.
Посочи дека досега 363 армиски припадници биле дел од АЛТЕА, додека во мисијата на ЕУ во Централноафриканската Република учествувале шест армиски офицери.
Како што информираат од МО, Петровска изрази задоволство од силниот интензитет на одбранбената соработка помеѓу земјата и Европската Унија и се заблагодари за европската поддршка на процесот на модернизација и опремување на Армијата со девет милиони евра обезбедени преку Европскиот мировен фонд.
„Фактот дека Европскиот мировен фонд покажа интерес да го поддржи опремувањето и модернизацијата на Армијата со 9 милиони евра, покажува дека интересот за уште поблиски односи помеѓу Северна Македонија и Унијата е голем. Нашата земја го започна пристапниот процес, нашето општество е базирано на современи европски вредности и ние припаѓаме на Европа“, заклучи министерката.
Генералот Бриегер изрази задоволство што и двете страни се амбициозни во намерата да ја зацврстат одбранбената соработка и се заблагодари за долгогодишното учество на припадниците на Армијата на Република Северна Македонија во мисии и операции на Унијата.