Денес со делегација од Град Скопје сме во службена посета на градот Измир, Република Турција, каде одржавме работна средба со градоначалникот Мустафа Тунч Сојер и потпишавме протокол за збратимување помеѓу Скопје и Измир, соопшти градоначалничката на Скопје Данела Арсовска.
„Со градоначалникот на Измир, со кој денеска потпишавме протокол за збратимување, изразивме подготвеност за зајакнување на меѓусебните пријателски релации и соработка на конкретни проекти од взаемен интерес, во областа на туризмот, економијата, културата, образованието и животната средина“, вели таа преку соопштение до јавноста.
Со овој протокол, Град Скопје и Град Измир, пристапуваат кон конкретна соработка преку реализација на проекти од взаемен интерес и утврдување на соодветна динамика за нивна имплементација.
На денешната средба на покана на градоначалникот на Измир, присуствуваа пратеници, советници, градоначалници од 30 општини во состав на градот Измир, како и голем број на здруженија, организации од деловната заедница и асоцијации на македонски иселеници во Измир.
„Овој протокол е од исклучителна важност за градот Скопје од аспект на меѓународно поврзување со град со кој взаемните интереси и цели ќе се преточат во проекти во сите области од интерес, како и размена на искуства кои се во надлежност на локалната самоуправа“, велат од Град Скопје.