Министерот за правда Кренар Лога, на првиот брифинг со новинарите откако стапи на функцијата, посочи дека е „прашање на денови“ кога ќе биде формирана работната група за уставни измени во која ќе учествуваат претставници од повеќе области во државата.
Меѓутоа, тој за првпат кажа и дека се размислува и за други измени на Уставот, како што е измената во делот каде министерот за правда по функција е член на Судски совет, регулирање на вакумот со распуштање на Собранието и при смената меѓу еден и изборот на друг министер, како и во делот на тоа што беше проблематично во пандемијата и други прашања како што е делот со 20 проценти за јазикот.
„За нас приоритет останува Преамбулата во делот на вметнување на помалите заедници во државата. Ако има расположение кај сите учесници, ние сме подготвени сите овие предлози да бидат дел“, изјави Лога, посочувајќи дека негов став е кога веќе се отвора Уставот подобро е сите овие прашања да одат во пакет.
Министерот рече дека е во комуникација со сите чинители во државата Ковачевски, со шефот на пратеничката група на ВМРО-ДПМНЕ Никола Мицевски и лидерот на партијата Христијан Мицкоски, и дека е прашање на денови кога ќе биде формирана работната група за уставните измени.
„Очекувам опозицијата да е дел од работната група, не само за уставните измени, туку и за Изборниот законик и сите други работни групи врзани со реформи, не само за правосудниот систем, туку и за други области“, изјави Лога, изразувајќи уверување дека ВМРО-ДПМНЕ ќе се надмине себеси и ќе биде дел од ова, како што рече, за да не бидеме повторно десет години во изолација.
Во однос на тоа дали веќе се разговара за конкретни имиња во работната група, Лога, посочи дека има предлози и некои имиња веќе се на маса, но дека остава простор и за ВМРО-ДПМНЕ.
„Во првата недела од мојата функција пратив писмо до ВМРО-ДПМНЕ да предложат свој член на работната група, потоа уште едно и до Мицкоски, каде кажав дека им го отстапувам и местото претседател на комисијата. Нема да чекаме бескрајно, до крајот на оваа недела ќе почекаме“, изјави Лога, на денешниот брифинг со медиумите во Министерството за правда.