Се зголемуваат доказите дека браната Нова Каховка е крената во воздух, по објавувањето на сеизмички податоци кои покажуваат експлозија во раните утрински часови во вторникот, пишува Гардијан.
Независната истражувачка фондација Норсар (Норвешка сеизмичка агенција) вели дека сигналите од регионалната станица во Романија укажуваат на експлозија во 2.54 часот. Норсар нема донесено заклучоци за тоа кој е одговорен.
Украинската влада соопшти дека руските окупациски сили имале контрола над хидроелектраната на врвот на браната и ја користеле во моментот на експлозијата, а експертите велат дека би било многу полесно да се крене браната одвнатре отколку да се пука во неа од далечина.
Во петокот наутро, Украинската служба за безбедност (УСБ) објави снимка за која тврди дека е пресретнат телефонски повик што ја докажува одговорноста на Русија за минирањето на браната.
УСБ објави снимка од телефонскиот разговор во траење од 90 секунди на апликацијата за социјални медиуми Телеграм и тврди дека е помеѓу двајца „окупатори“, како што украинските власти најчесто ги нарекуваат руски војници.
Не можеше да се потврди автентичноста на повикот. Најавата на УСБ не ги идентификува говорниците, ниту пак го означува времето или местото каде што се одиграл повикот. Извор од УСБ изјави дека повикот бил пресретнат во четвртокот и дека не може да се дадат дополнителни детали бидејќи снимката е дел од кривична истрага.
Украинските власти изразија незадоволство што извештајот на Киев за уништувањето на браната сè уште не е потврден од американски, британски или други разузнавачки агенции.
Ихор Сирота, извршен директор на украинската хидроцентрала Укрхидроенерго, ги отфрли сугестиите дека браната можеби е уништена како резултат на украинско гранатирање или катастрофален дефект на структурата, велејќи дека тоа е руска пропаганда.
„Објектот е дизајниран да издржи нуклеарен напад“, изјави Сирота за Гардијан во интервју во Киев.
„За да се уништи фабриката однадвор, на истото место требаше да бидат фрлени најмалку три воздушни бомби, секоја тешка по 500 килограми. Станицата беше крената во воздух одвнатре“, објасни тој.