Турција, Бугарија и Романија, трите членки на НАТО со излез на Црното Море, денеска потпишаа Договор за борба против заканата од пловечки мини. Иницијативата, потпишана во Истанбул, треба да обезбеди безбедност на пловидбата, вклучувајќи ги и бродовите за извоз на украинско жито.
Договорот беше потпишан во палатата на Босфор, јужната порта на Црното Море, од страна на романскиот министер за одбрана Ангел Тилвар, бугарскиот заменик-министер за одбрана Атанас Запрјанов и турскиот министер за одбрана Јашар Ѓулер.
„Заеднички одлучивме да го потпишеме протоколот на трите земји со цел поефикасна борба против заканата од мини во Црното Море, преку зајакнување на постојната соработка и координација“, рече Ѓулер.
Преговорите кои претходеа на договорот започнаа во септември.
Турција ја основа Црноморската MCM група во август 2023 година, откако Москва одби да го продолжи договорот за жито што дозволува извоз од Украина преку Црното Море.
Ѓулер нагласи дека „иницијативата ќе биде отворена само за бродовите на трите сојузнички земји со излез на Црното Море“, во согласност со сегашните конвенции.
Од почетокот на руската инвазија на Украина на 24 февруари 2022 година, во Црното Море се забележани повеќе пловечки мини.
Кон крајот на декември, товарен брод под знамето на Панама налета на мина пловејќи до украинското пристаниште каде требало да истовари жито, при што беа повредени двајца морнари.