Актуелниот претседател Стево Пендаровски денеска на прес-конференција, најави дека повторно ќе се кандидира за функцијата. Во текот на викендот, се очекува владејачката СДСМ и официјално да го поддржи Пендаровски во трката за втор мандат.
Претседателот порача дека добил јавна поддршка од голем број граѓани, дел од нив јавни личности, професори и културни работници.
-Во недела ќе бидам на Конгресот на СДСМ, само во тој дел, за да им се заблагодарам за поддршката, а од понеделник ќе имам средби со сите десетина партии од таа коалиција, од кои ќе сакам да слушнам предлози, кои би ги вклучил во мојата програма. Станува збор за граѓанска кандидатура и ги повикувам сите граѓани, од недела 3-ти март, да дадат поддршка за мојата кандидатурата во подрачните единици на ДИК, истакна Пендаровски.
За причините зошто се кандидира, претседателот вели дека зад има себе мандат без ниту една стратешка грешка, без ниту една корупциска афера и без ниту еден случај на непотизам. Очекува во неговиот евентуален втор мандат, Македонија да стане членка на ЕУ.
-Веројатно за првпат во македонската историја, ќе имаме најголема бројка на кандидати во првиот круг од претседателските избори и тука се можни преклопувања на партиските електорати. Можеме да имаме дури седум кандидати во првиот круг, рече шефот на државата, Стево Пендаровски за неговите очекувања од претседателската трка.
На прашањето дали доколку отиде во вториот круг, ги очекува гласовите од Албанците и партијата ДУИ, Пендаровски наведе дека ги очекува гласовите од сите етнички заедници, како што било и во 2014 година. Претседателот информира дека во таа година имал 35 илјади албански гласови, без политички договор.
Вели дека „не размислува на тој начин“ кој би бил негов противкандидат во вториот круг од претседателските избори. Ги почитува сите кандидати и истакна дека има коректни односи.
-Се кандидирам, не само за да учествувам на изборите, туку и да победам, категоричен е Пендаровски, давајќи одговори на новинарски прашања на прес-конференција, на која ја најави неговата повторно кандидатура за местото во „Вила Водно“.
Д.В / Цивил Медиа