„Фабриките на лажни вести на ВМРО-ДПМНЕ, кои и сега ефикасно работат, ќе се институционализираат. Пропагаторите повторно ќе сеат страв и поделби, но овој пат со инструментите на власта. А граѓаните нема да можат да оценат што е реалност а што фикција подготвена во Белата палата. Ова е реална опасност која мора да ја спречиме“ реагира носителот на ИЕ4 од СДСМ, Венко Филипче во врска со скандалот во кој опозициската ВМРО-ДПМНЕ организира емисии со лажни анкети на МТВ.
Тој додава дека ако со нешто може да се пофали СДСМ и оваа Влада, тоа е враќањето на слободата и ослободувањето на медиумите.
„Прашајте било кој новинар ова ќе ви го потврди. Некогаш граѓаните ми велат, аман со таа слобода ништо не видовме од неа. Точно, таа не се гледа кога ја имаме, но многу се чуствува кога ќе ја изгубиме. Треба секој да е свесен за ова, да не биде доцна“ вели Филипче.
Тој запраша ако ВМРО-ДПМНЕ се спремни ова да го прават од опозиција, што ли ќе се случува доколку граѓаните им дадат доверба на избори.