Хелскишкиот комитет во месечниот извештај нотира неколку случаи на прекршување на човековите права.
На 24.01.2013 година група активисти за човекови права, преку отворено писмо, упатија критики до Народниот правобранител поради непокренување постапка за заштита на уставните и законските права на граѓаните прекршени при насилното отстранување на пратениците од опозицијата на седницата на 24 декември минатата година. Токму за време на оваа седница, истакнуваат од Хелсиншкиот, господинот Иџет Мемети беше повторно предложен и реизбран да ја извршува функцијата Народен правобранител во следните 8 години. По поднесена претставка од страна на Здружението на новинари, Народниот правобранител утврди дека нема надлежност да постапува за инцидентот во кој новинари беа насилното отстранети од галеријата на Собранието. Хелсиншкиот комитет констатира дека Народниот правобранител, и покрај тоа што имал надлежност и можел да поведе постапка по сопствена иницијатива, не ги заштитил уставните и законските права на граѓаните повредени со дејствијата на органите на државната управа.
Според Хелсиншкиот, забележан е генерален недостаток на развиена свест за парламентарна демократија кај дел од пратениците преку навредите кои ги упатија кон преставниците на граѓанската иницијатива АМАН.
Потоа, по спроведен вонреден инспекциски надзор на Факултетот за безбедност – Скопје, било утврдено дека проф. д-р Фросина Ременски, како член на Советот за безбедност, врши функција во политичката партија СДСМ поради што истата не може истовремено да ја врши функцијата продекан на факултет и треба да се откаже од една од функциите. Хелсиншкиот комитет смета дека член на Советот за безбедност, кој е советодавно тело, не претставува вршење на функција во политичка партија, поради што сметаме дека инспекторот извршил директна дискриминација врз основа на политичка припадност, неосновано ограничувајќи и на проф. д-р Фросина Ременски повеќе права, а пред се правото да биде носител на функција.
Ова се само мал дел од случаите кои изминатиов месец ги разгледувал Хелсиншкиот комитет, целосниот извештај можете да го погледнете на нивната официјална веб страница, како и на следниов линк.