Утрово во 8 часот пред Медицинскиот факултет во Ниш се собраа студенти и граѓани во знак на протест што раководството на тој факултет најави дека од денеска ќе почне онлајн компензацијата за наставата од зимскиот семестар.
Студентите пред влезот на зградата поставија голем транспарент на кој пишуваше „Каде ти е лиценцата“.
Наведоа дека Медицинскиот факултет нема лиценца за организирање настава преку Интернет и дека дипломите што ќе ги добијат студентите кои посетуваат онлајн настава ќе бидат неважечки.
За време на протестот беше прочитана Хипократовата заклетва, а учесниците на протестот на кратко го блокираа булеварот „Д-р Зоран Ѓинѓиќ“.
Студентите ги повикаа студентите на тој факултет да ја бојкотираат наставата преку Интернет и на протестот порачаа дека нивната борба за исполнување на барањата на студентите не е завршена.
Студентите најавија дека ќе протестираат до 15 часот пред факултетот.
Управата на Медицинскиот факултет вчера излезе со соопштение во кое ги демантираше тврдењата на студентите дека високообразовната институција нема лиценца за организирање настава преку Интернет и дека дипломите ќе бидат неважечки.
Во соопштението се наведува дека на Наставно-научниот совет одржан на 27 март донесена е одлука за имплементација на Планот за динамички надоместок на наставата со почеток на 15 април.
Поради најавениот почеток на онлајн наставата, студентите на Медицинскиот факултет од 10 април го блокираат влезот и не дозволуваат ниту еден од вработените на факултетот да влезе во зградата.