Најмалку две лица загинаа во Кијив во текот на ноќта кога остатоци од дрон погодија станбени згради, предизвикувајќи пожари во неколку области, соопштија денеска агенцијата за цивилна заштита и градоначалникот Виталиј Кличко.
Жртвите биле пронајдени додека пожарникарите се обидувале да ги изгаснат пожарите во становите кои избувнаа откако делови од дрон паднаа на петкатна зграда. Во меѓувреме, сирените за воздушна тревога и утрово продолжија да се огласуваат во главниот град, а Кличко ги упати жителите да се засолнат.
Кличко изјави дека уште осум лица се повредени, меѓу кои четири деца. Службите за цивилна заштита потврдија петмина повредени. Тејмур Ткаченко, шеф на градската воена управа, исто така на Телеграм соопшти дека има пет повредени.
Во една област беа уништени делови од станбена зграда, информира Ткаченко. Во друг случај се запалиле станови на седми, осми и деветти кат од десеткатна зграда. Погоден е и супермаркет.
Украинските медиуми известија за експлозии кои се слушнале за време на воздушната тревога во градот.
Украинскиот претседател Володимир Зеленски на Фејсбук соопшти дека во текот на ноќта, Русите лансирала четири балистички ракети и 142 дронови, половина од нив „Шахеди“. Според него, десетици други беспилотни летала сè уште се во украинското небо.
Зеленски информира дека Кијив бил погоден двапати – прво од балистички ракети, а потоа утрово и од дронови. Сите служби за итни случаи моментално се на терен и им помагаат на луѓето. Досега има извештаи за седуммина повредени, меѓу кои четири деца.
За жал, загинаа жена и нејзиниот син. Мое сочувство до семејството и најблиските, напиша Зеленски.
Тој информира дека од синоќа имало и бројни напади врз регионите Запорожје, Доњецк, Житомир, Херсон и Дњепар. Службите за итни случаи беа распоредени на сите тие локации. По рускиот балистички ракетен напад врз Велика Чернеччина во регионот Суми, Русите исто така почнаа да фрлаат воздушни бомби и да ја гранатираат областа – токму кога беа во тек спасувачките операции, дополни тој.