Израелските одбранбени сили (ИДФ) денес потврдија дека извршиле рација во зграда во Деир ал-Балах, во централна Газа, која ја користи Светската здравствена организација (СЗО), и дека привеле неколку лица осомничени за врски со терористички активности.
Во исто време, СЗО тврди дека објектот и блискиот магацин биле оштетени во израелските воздушни напади, објави денес „Тајмс оф Израел“. Израелската војска вели дека операцијата е спроведена откако војниците биле нападнати во областа и одговориле.
Пред операцијата во областа, ИДФ издаде предупредување до цивилите да се евакуираат за нивна безбедност и беше во контакт со меѓународните организации што работат во областа, се вели во соопштението на израелската војска.
ИДФ потврди дека неколку лица осомничени за вмешаност во терористички активности се приведени како дел од поширока копнена операција, додека повеќето од нив, откако беа испрашувани на лице место, беа ослободени и евакуирани во координација со меѓународните организации.
Од друга страна, СЗО соопшти дека израелските војници „го нападнале објектот и ги принудиле жените и децата да ги напуштат просториите, додека мажите, вклучувајќи го персоналот и членовите на нивните семејства, биле врзани, претресувани и испрашувани под закана со оружје“.
Според СЗО, двајца членови на персоналот и двајца членови на нивните семејства биле приведени. Тројца подоцна биле ослободени, додека еден вработен останува во притвор.
ИДФ нема да се двоуми да дејствува во области каде што терористичката активност ја загрозува безбедноста на Државата Израел, соопшти војската.
СЗО, исто така, соопшти дека главниот магацин на организацијата во Деир ал-Балах бил оштетен за време на израелските напади, но ИДФ не ги коментирал тие тврдења, пренесува Танјуг.