Украина вчера ја критикуваше Русија за планот за повлекување од Конвенцијата на Советот на Европа за спречување на тортура, коментирајќи дека предлогот е премолчено признание на вината на Москва.
Украинските власти ја обвинија Русија за воени злосторства и мачење цивили и воени заробеници откако започна руската инвазија во 2022 година. Русија ги негира обвинувањата.
Руската влада на својата веб страница во понеделникот објави планови за повлекување од Конвенцијата против тортура и нечовечко или понижувачко постапување или казнување, која Москва ја потпиша во 1996 година.
„Овој чекор всушност е признание на вина, за систематско мачење и обид за избегнување на одговорност за сериозни кршења на човековите права“, објави украинското Министерство за надворешни работи.
Руската влада не одговори на барањето за коментар.
Одлуката на Москва мора да биде одобрена од претседателот Владимир Путин и усвоена од парламентот пред да стапи на сила.
Комисијата за борба против тортура на Обединетите нации во март објави дека „широко распространетата и систематска“ употреба на присилни исчезнувања и тортура врз Украинци од страна на Русија за време на војната во Украина претставува злосторства против човештвото.