Во СДСМ со неколку прес конференции изминатиов викенд тврди дека Владата на Христијан Мицкоски спроведува шема за испумпување на јавни пари и бара постапувањ од институциите.
Со низа документи и детални наводи, СДСМ објави нов скандал поврзан со државни тендери, обвинувајќи дека фирма формирана пред една година, со само двајца вработени, добила договори вредни речиси девет милиони евра од владини институции.
Генерален секретар на СДСМ, Александар Саша Димитријевиќ, излезе со серија тврдења за, како што рече, „класична шема за испумпување пари“ од Владата на Христијан Мицкоски.
Според СДСМ партија, компанијата „Дигитал оне“, основана во август минатата година, со само двајца вработени, во периодот од мај до ноември 2025 година добила државни тендери во вкупна вредност од околу 9 милиони евра.
Од шесте објавени договори, како што наведува СДСМ, четири се добиени од Генералниот секретаријат на Владата, а најголемиот меѓу нив е рамковна спогодба за софтверски лиценци во вредност од околу 8 милиони евра.
На прес конференција Димитријевиќ праша како е можно фирма без историја, без искуство и со минимален број на вработени да добива вакви договори, оценувајќи го случајот како „типична шема за фаворизирање фирми блиски до власта“.
Од СДСМ исто така побараа одговор дали основачот на фирмата, Кристијан Арсовски, е во роднински врски со поранешниот портпарол на ВМРО-ДПМНЕ, Димитар (Димса) Арсовски – прашање за кое, како што истакнуваат, се уште нема одговор.
Вториот вработен, Глигор Поцев, бил дел од УБК во времето на Мијалков и сведок во случајот „Тврдина“ за уништување на опремата за прислушување, објави портпаролката на СДСМ, Богданка Кузеска.
Сега, фирмата со која е поврзан добива државен тендер за софтверски лиценци, велат од СДСМ.
Оттаму тврдат дека ова покажува континуитет на криминални практики од времето на Груевски и Мијалков – тендери за фирми без историја, сомнителни врски и богатење на врвот на власта. Бара истрага, институционално делување и одговорност, посочувајќи дека ваквите дела не застаруваат.
Опозицијата обвинува дека институциите молчат, а наместо тоа реагирала партијата ВМРО-ДПМНЕ, што според СДСМ претставува „дополнителна потврда“ дека тендерските процеси биле координирани на партиско ниво.
СДСМ го спореди случајот со практиките од времето на поранешниот премиер Никола Груевски, тврдејќи дека се повторуваат состојби од периодот кога, според нив, биле испумпани околу 2 милијарди евра од јавни пари.
СДСМ ги повика Јавното обвинителство, Финансиската полиција и Државната комисија за спречување корупција, ДКСК, да отворат истрага и да ги проверат сите околности околу доделувањето на милионските тендери.
Од опозициската партија најавија дека ќе продолжат да објавуваат, како што велат, дополнителни аспекти, информации и документи за случајот.
Фирмата „Дигитал оне“ која ја посочуваат о СДСМ, е основана кон крајот на август 2024 година, со основачки влог од 5.000 евра и била со двајца вработени. Во периодот од мај до ноември 2025 фирмата добила шест државни договори со вкупно вредни околу 9 милиони евра, соопштија од СДСМ.
Од тие договори, четири се со Генералниот секретаријат на Владата, нај скапиот е рамковна спогодба за софтверски лиценци за виртуелна платформа, вредна околу 8 милиони евра.