Земјоделците во Грција продолжуваат со масовните протести и за денеска најавуваат ново блокирање на границите.
Со повеќе од 50 блокади распоредени низ цела Грција – меѓу кои и на граничните премини кон Македонија, Бугарија и Турција – земјоделците продолжуваат со масовните протести и за денеска најавуваат ново блокирање на границите.
Во Ираклион на островот Крит, аеродромот е затворен до раните утрински часови, поради што беа откажани голем број летови, објави грчки „Катимерини“.
Граничниот премин „Евзони“ и денеска ќе биде неколку часа блокиран, првин од 12 до 16 часот, а потоа повторно од 18 до 22 часот по локално време. Исклучок од ограничувањата ќе важи само за грчките камиони што ја напуштаат земјата. Блокадата таму е поставена со повеќе од 300 трактори, а земјоделците секојдневно одлучуваат колку долго ќе го затвораат преминот.
Трактори има и на преминот Ники (Меџитлија), каде што, според грчките медиуми, денеска е закажана четиричасовна блокада од 10 часот. Попречувања во сообраќајот има и на граничните премини кон Бугарија и Турција.
На Крит ситуацијата ескалираше кога земјоделците на патот кон аеродромот во Ираклио се судрија со полицијата, го пробија кордонот и упаднаа на пистата, по што аеродромот беше затворен од синоќа до утринава. Слични инциденти се случија и во Ханија, каде што демонстрантите, исто така, се обидоа да стигнат до аеродромот.
Најголемиот земјоделски камп е поставен кај Никеа, во близина на Лариса на автопатот Солун – Атина, каде што сообраќајот се пренасочува по споредни патишта. За утре е најавен нов протест во Волос, како и блокада на пристаништето. Дополнителни блокади има на автопатот Е65, кој ги поврзува Ламија, Кардица и Трикала со автопатот Егнатија.
Протестите започнаа на 30 ноември поради високите трошоци за производство, ниските откупни цени и скандалот со земјоделските субвенции од ЕУ. Главното барање на земјоделците е да се исплатат заостанатите средства и да се намалат производствените трошоци. Засега не е познато колку долго ќе продолжат протестите.
На неколку блокади земјоделците поставија и новогодишни елки – симболична порака дека нема намера да се повлечат и дека, ако треба, празниците ќе ги поминат на улица.