Фатмир Битиќи: За 2026 година имаме буџет во кој 90 отсто од средствата одат за тековни расходи. Ако не се исполнат буџетските проекции, тоа ќе значи сериозни тешкотии во покривањето на елементарните потреби на општеството. Во овој момент категоријата на пристигнати, а неплатени обврски, плус долгот по основ на ДДВ, е приближно една милијарда евра,
Буџетот за 2026 година е преамбициозен, нереално испланиран и Македонија влегува во сериозна зона на задолжување. Слабата реализација на приходите, ниското ниво на капитални инвестиции и обидот да се затвори трезорот, е сигнал за сериозни проблеми со ликвидноста и економската активност. Граѓаните ќе плаќаат сè повеќе поради растот на цените, а ќе живеат посиромашно.
Годинава ќе ја завршиме некаде со 90 проценти реализација на приходите во Буџетот за 2025 година. Тие нереализирани 10 проценти се недостиг од околу 630-640 милиони евра.
Не можам да најдам некоја влада од самостојноста со ваква слаба реализација. Тоа укажува на грешки при планирањето. Ако се земат предвид овие над 600 милиони евра што нема да се соберат и ако се земат предвид уште 600 милиони евра што се обезбедени за покривање на дефицитот, тоа е промашување од 1,2 милијарди евра. Тоа дефинитивно укажува дека имате сериозен проблем со економската активност, со потрошувачката, со извозот, со увозот и со различните категории од каде што доаѓаат приходите. Плус, недостигаат речиси 380 милиони евра за капиталните инвестиции и дека нивната реализација е околу 52 проценти, што исто така е незапамтено.
Државата е сериозно заглавена и во долгови кон стопанството, во пристигнати и неизмирени обврски, во поврат на ДДВ. Цената на тоа е намалување на приходите. Затоа што во овој момент категоријата на пристигнати, а неплатени обврски, плус долгот по основ на ДДВ, е приближно една милијарда евра.
Извор: Слободен печат.мк