Европската Унија повика на смирување на тензиите и воздржаност од сите актери во Венецуела во соопштение поддржано од 26 земји членки. Единствената членка што не ја потпиша изјавата е Унгарија, чиј премиер Виктор Орбан е близок сојузник на американскиот претседател Доналд Трамп.
Европската Унија ги повикува сите актери да бидат смирени и воздржани за да се избегне ескалација и да се обезбеди мирно решение на кризата. ЕУ потсетува дека, под сите околности, мора да се почитуваат принципите на меѓународното право и Повелбата на ООН. Членовите на Советот за безбедност на Обединетите нации имаат посебна одговорност за почитување на тие принципи, како столб на меѓународната безбедносна архитектура.
ЕУ постојано изјавува дека Николас Мадуро нема легитимитет на демократски избран претседател и се залага за мирна транзиција кон демократија под водство на Венецуела, почитувајќи го нејзиниот суверенитет. Правото на венецуелскиот народ да ја одреди својата иднина мора да се почитува.
ЕУ го дели приоритетот на борбата против транснационалниот организиран криминал и трговијата со дрога, кои претставуваат значајна закана за безбедноста низ целиот свет. Во исто време, ЕУ нагласува дека овие предизвици мора да се решат преку одржлива соработка со целосно почитување на меѓународното право и принципите на територијален интегритет и суверенитет, се вели во соопштението.
Оттаму додават дека се во контакт со САД, како и со регионалните и меѓународните партнери, со цел, како што посочуваат, да се поддржи и олесни дијалогот со сите вклучени страни, што „ќе доведе до демократско, инклузивно и мирно решение на кризата, под водство на Венецуелците.
„Почитувањето на волјата на венецуелскиот народ останува единствениот начин Венецуела да ја врати демократијата и да ја реши сегашната криза. Во овој критичен момент, важно е сите актери целосно да ги почитуваат човековите права и меѓународното хуманитарно право.
Сите политички затвореници што се моментално притворени во Венецуела мора да бидат безусловно ослободени. Конзуларните власти на земјите членки на ЕУ тесно соработуваат за да ја заштитат безбедноста на граѓаните на ЕУ, вклучително и оние што се нелегално притворени во Венецуела, се појаснува во соопштението.