Иранскиот врховен водач, ајатолахот Али Хамнеи е мртов, потврдија денеска иранските државни медиуми.
Тој е убиен како „маченик“, објавија новинските агенции ИРНА и Фарс. Како одговор на ова, иранското раководство прогласи 40 дена национална жалост, според иранската државна телевизија.
Претходно, американскиот претседател Доналд Трамп го прогласи Хамнеи за мртов, откако Соединетите Држави и Израел вчера почнаа сеопфатни напади врз Иран.
„Хамнеи, еден од најзлобните луѓе во историјата, е мртов“, напиша Трамп на Truth Social, додавајќи: „Ова е единствената најголема шанса за иранскиот народ да си ја врати својата земја“.
Верскиот водач имаше клучна улога во обликувањето на внатрешната и надворешната политика на Иран во текот на последните децении, развивајќи ја Исламската Република во моќен регионален играч, пренесува ДПА.
Вчерашните напади беа насочени кон клучни локации каде што се состанувало иранското раководство, при што беа убиени највисоки функционери, вклучувајќи го министерот за одбрана и шефот на Корпусот на исламската револуционерна гарда, соопшти претходно израелската војска.
Нападот, во кој загинаа повеќе од 200 луѓе според Црвената полумесечина, предизвика одмазднички напади врз Израел и американските воени сили стационирани на Блискиот Исток.
Врховниот совет за национална безбедност на Иран во соопштение наведува дека „мачеништвото на имамот Али Хамнеи ќе го означи почетокот на големото востание против тираните на светот“.
Советот беше формиран во август за да ја централизира воената стратегија по 12-дневната војна во која Израел и САД го нападнаа Иран.