СДСМ смета дека по вчерашната прес-конференција на Владата во врска со прославата по повод 35 години независна Македонија, јавноста остана без одговор на суштинските прашања – кој, како и по кои критериуми одлучува за трошењето на парите на граѓаните.
Оваа Влада и натаму на дело покажува дека секогаш кога ВМРО-ДПМНЕ е на власт, транспарентноста и отчетноста се сведени на нула. Наместо јасни критериуми, јавни повици и институционален пристап, сведоци сме на затворен круг на привилегирани поединци и компании.
Тоа е директно потценување на јавноста, на културните работници и на институциите на системот.
За разлика од денешната практика, кога СДСМ ја презеде Владата во 2017 година, за првпат по 11 години владеење на ВМРО-ДПМНЕ, Министерството за култура најтранспарентно и јавно ги објави до денар сите износи и сите корисници од програмите за култура. Граѓаните точно знаеја каде завршуваат нивните пари.
Денес повторно се враќаме на моделот на нетранспарентност, фаворизирање и приватизација на културата.
Затоа, јавноста заслужува одговор на неколку клучни прашања:
- По кој критериум е избрана агенцијата „Авалон продукција“ за организација на настанот?
- По кој критериум сопственикот на приватна компанија добива ексклузивно право да избира кои македонски музички ѕвезди ќе настапуваат на прославата на државен празник?
- По кој критериум приватна компанија се става на пиедестал над националните институции од областа на културата, кои постојат токму за да ја претставуваат државата и нејзините културни вредности?
- Зошто повторно се заобиколуваат институциите и се создава впечаток дека културата е приватен бизнис на блиски структури до власта?
Особено загрижува фактот што во моментот Македонија има врвни уметници и музички имиња од областа на класичната музика, кои настапуваат на најпрестижните светски сцени и се вистински амбасадори на македонската култура во светот.
Наместо државата да покаже достоинство, институционален капацитет и почит кон сопствените културни вредности, повторно сведочиме на селективност, естрадизација и целосно игнорирање на националните културни институции и врвните уметници.
Прославата на 35 години независна Македонија треба да биде државнички и обединувачки чин, а не уште еден пример за нетранспарентно трошење јавни пари и партизација на културата.