Седницата на Комисијата за политички систем и односи меѓу заедниците на која требаше да биде разгледуван Извештајот на Специјалното јавно обвинителство денеска повторно е одложена по одлука на претседателот на Комисијата, Владимир Ѓорчев.
Според него причина за тоа е неприсуството на претставник од СЈО, иако тврди дека обвинителката Јанева била уредно поканета. Од СЈО демантираат дека добивале покани од Собранието, но и дека ако добијат, нема да присуствуваат бидејќи за овој краток период Извештајот е јасен, а доколку пратениците имаат забелешки, СЈО ги повикува да ги достават до нив.
Седницата која денеска започна со 1 минута молк за жртвите од терористичкиот напад во Белгија е презакажана за утре во 13 часот.
– Највисокиот државен акт, Уставот на Република Македонија, во својот член 68 му дава обврска на Собранието на Република Македонија да врши надзор и контрола над сите вршители на јавни функции кои се одговорни пред Собранието. Таа надлежност на Собранието никој не може и не смее да ја оспори или суспендира, рече Ѓорчев, кој потенцираше дека Јанева била единствената која не ја почитувала оваа институција.
Тој упати на Законот за ова обвинителство во член 7 дека: Јавниот обвинител ќе биде одговорен за неговата работа пред Собранието на Република Македонија.
– И Уставот и Законот се јасни и велат: Катица Јанева е одговорна пред Собранието на Република Македонија. Тука нема и не смее да има никаква дилема. Госпоѓата Јанева е јавен функционер и не треба, не може и не смее да се става над Уставот, Законот и Собранието на Република Македонија, рече Ѓорчев.
Од друга страна, Рената Дескоска, пратеничката од СДСМ вели, Ѓорчев со своите постапки го крши Деловникот, и сам одлучувал а со тоа бил очигледен стравот на ВМРО-ДПМНЕ од работата на СЈО.
– На сите ни јасно дека заради стравот од одговорност за криминалот, ВМРО-ДПМНЕ бега од дебата по Извештајот на г-ѓата Катица Јанева, но и по Извештајот на г. Марко Зврлевски. Во текот на преговорите за Закон за СЈО, СДСМ бараше СЈО да поднесува извештај на пократок рок, другата преговарачка страна бараше рокот да биде 6 месеци. Тогашната претпоставка беше дека на 15 март Собранието ќе биде распуштено и ВМРО-ДПМНЕ се надеваше дека извештајот на СЈО нема да се најде пред пратениците, рече Дескоска.
Таа во име на партијата го повика ВМРО ДПМНЕ „да не ја оневозможува дебатата по Извештајот на Катица Јанева доставен до Собранието пред една недела, а воедно и да се стави на дневниот ред Извештајот на г. Марко Зврлевски доставен до ова Собрание пред 9 месеци“.