Дополнителниот заменик-министер за информатичко општество, Александар Кирацовски информира дека има сериозни индиции за вмешаност на Министерството за информатичко општество и администрација во незаконски тендери.
– Станува збор за наоди на профит од стотици, па до милиони евра, што завршувале, според документите што ги имаме, кај неколку компании блиски до фамилијата на власт, изјави Кирацовски.
Како што вели тој, некои од информациите упатуваат на коруптивна и криминална позадина на дел од т.н. проект „Компјутер за секое дете“, што се реализираше преку МИОА.
Според документите со кои располага тој, Министерството за информатичко општество и администрација дозволило да биде избран поскап понудувач за набавка на лаптопи за учениците, иако постоел друг понудувач, којшто понудил иста конфигурација на компјутерите, а разликата во цена е скоро 2,3 милиони евра.
Се барало едно во тендерската документација за набавка на компјутерите, друго стоело во одлуката за примопредавање објавена во Службен весник а сосема трето било испорачано.
Во тендерската документација се барало компјутери со меморија на хард диск од 80 GB, во објавата во Службен весник истите компјутерите имаат хард диск со меморија од 4 GB, а во реалноста, испорачаните компјутери имаат хард диск од 8 GB.
– Има и други нерегуларности во процедурите за набавка на лаптопите, но она што денеска сакам да го нагласам е веројатниот криминал тежок над 200.000 евра, дополни тој.
Според тендерската документација и договорот, платени биле 53.000 лаптоп компјутери за учениците, но до образовните установи биле доставени 51.979, или точно 1.021 компјутер помалку.
Ова значи дека околу 200.000 евра од платените но неиспорачани компјутери завршиле во нечии џеб.
– Овие индиции кои произлегуваат од документите кои ми беа доставени на увид ќе послужат во следните чекори што ќе ги преземеме за веројатните злоупотреби во коишто се оштетени граѓаните, порача дополнителниот-заменик-министер.