Во денеска објавениот годишен Извештај на Фридом хаус, „Нации во транзиција“, за Македонија е забележан пад во шест од седумте категории што се земаат предвид.
Земјава назадува во категориите национално демократско владеење, изборен процес, независност на медиумите, локално демократско владеење, владеење на правото и независност на судството, борба со корупцијата. Напредок има само во категоријата граѓанско општество.
Ова придонело во извештајот на Фридом хаус сумарната оценка за демократскиот развој на Македонија да биде полоша од лани (сега е 4.29, а лани беше 4.07 – оценките се од 1 до 7, при што 1 претставува највисоко ниво на демократски развој, а 7 најниско).
– Имплементацијата на договорот постигнат со посредство на ЕУ ќе одреди дали Македонија ќе се стабилизира и ќе консолидира демократско владеење преку политички дијалог. Ефикасноста на преодната влада веројатно ќе биде спречена од политичката борба и различните струи во нејзините редови, можно е да бидат пропуштени роковите за реформи, иако севкупниот напредок треба да остане на вистинскиот пат поради притисокот и посредувањето од страна на ЕУ и меѓународната заедница, се наведува во прегледот за Македонија.
Во кампањата за предвремените избори ќе доминира скандалот со прислушувањето и, најверојатно, ќе биде придружена со етнонационалистичка и конфронтирачка реторика. Спроведувањето и исходот од изборите, како и работата на судството во истрагата на активностите на незаконско следење објавени во 2015 година, ќе бидат клучните фактори во одредувањето на правецот за демократско владеење во 2016 година, сметаат од Фрудом хаус.
Во регионот полоша генерална оценка во извештајот имаат само Босна и Херцеговина (4.50) и Косово (5.07). Подобри од Македонија се Албанија (4.14), Црна Гора (3.93), Србија (3.75), Хрватска (3.68), Бугарија (3.25). Во извештајот на Фридом хаус власта во Македонија е оценета како транзициска или како хибриден режим, за разлика од Србија во која се вели дека има полу-консолидирана демократија.
Целосниот Извештај е на следниот линк.